24 Ira 2026

MIRAI EuskoTren 2026-2027 denboraldiko taldearen aurkezpena IDKn: IZEN BERRIA BIHOTZ BERDINA.

Orain arte IDK EuskoTren izenarekin lehiatu den taldeak 2026/2027 denboraldiari izen berri batekin ekingo dio: MIRAI EuskoTren. Izen-aldaketa horrek ez ditu aldatu proiektuaren balioak, konpromisoa eta emakumezkoen kirolaren aldeko apustua; izan ere, urte hauetan guztietan proiektuaren oinarri izan dira.

IDKren instalazioek MIRAI Euskotren talde berriaren aurkezpena hartu zuten 2026 irailaren 22an, denboraldi berriari begira. Ekitaldian erakundeetako ordezkariak, babesleak, talde teknikoa, jokalariak eta enpresako hainbat kide izan ziren.

Ekitaldian zehar, taldearen ibilbidea eta urte hauetan guztietan erakundeek eta enpresa laguntzaileek emakumezkoen kirolarekin izan duten konpromisoa nabarmendu ziren. Laguntza horri esker, emakumezkoen kirolaren hazkundea, ikusgarritasuna eta profesionalizazioa bultzatzen jarraitu da.

Jardunaldiak aukera eman zuen, halaber, denboraldi berriari ilusioz eta anbizioz aurre egingo dioten jokalariak gertutik ezagutzeko. Taldekideek konfiantzazko mezu argia helarazi zuten erronka berriaren aurrean: «Denboraldirako prest iristen gara».

IDKtik eskerrak eman nahi dizkiegu aurkezpenean parte hartu zuten pertsona eta erakunde guztiei, eta bereziki emakumezkoen kirolaren aldeko apustua egiten eta MIRAI Euskotren bezalako proiektuak hazten laguntzen jarraitzen dutenei.

Zorte on denboraldi berri honetan, taldea!